ရခိုင်တိုင်းရင်းသား တစ်ယောက်ဖြစ်ရတာကို ဂုဏ်ယူပါတယ်ဆိုတဲ့ နေတိုး

======================================================

၂၀၁၅ ရွေးကောက်ပွဲမှာ မဲလေးမဲပေးခွင့်ရခဲ့တဲ့အတွက် စိတ်ကျေနပ်မိတဲ့ နေတိုးက မြန်မာနိုင်ငံကို ဖြစ်စေချင်တဲ့ ဆန္ဒ ၊ ရုပ်ရှင်လောကကို တိုးတက်စေချင်တဲ့ ဆန္ဒများနဲ့ လက်ရှိမှာ ရိုက်ကူးနေတဲ့ ဗီဒီယိုကားအကြောင်းတွေကို မေးမြန်းကြည့်ဖြစ်တဲ့အခါ

-၂၀၁၅ ရွေးကောက်ပွဲမှာ မဲပေးရတဲ့ အတွေ့အကြုံလေးလဲဝေမျှပေးပါဦး။

ကျွန်တော်တို့မဲရုံ ၂ ရုံသွားပေးရတယ်။ ၂ ခုလုံး အဆင်ပြေခဲ့ပါတယ်။ မဲရုံ ၂ရုံလုံးလဲ အနိုင်ရပါတယ်။ ဒါသည် ကျွန်တော်တို့ရှေ့လျှောက်ရမဲ့ အနာဂတ်တစ်ခု၊ ကိုယ်တွေ အခုနိုင်လိုက်တာဟာလဲ ဒီပါတီတစ်ခုက အနိုင်ရတာထက်ကို ပြည်သူလူထုတစ်ရပ်လုံးက အနိုင်ရတယ်လို့ပဲခံစားရပါတယ်။ အဲ့ဒီအတွက်လဲ ၀မ်းသာမိတယ်။ ကြည်နူးမိတယ်။ အဲ့ဒီအတွက် အနောက်မှာဖြစ်ပေါ်လာမဲ့ အနာဂတ်တွေ၊ မျှော်လင့်ချက်တွေကတော့ ဘယ်လိုဖြစ်ပေါ်လာမလဲဆိုတာကို ရင်ခုန်စွာနဲ့ပဲ ကျွန်တော်တို့ကမျှော်လင့်နေရမှာပါ။ အင်အားတွေလဲရှိနေပါတယ်။

-မဲက လေးမဲထည့်ခဲ့ရတယ်လို့သိရတယ်။

ဟုတ်ပါတယ်။ ကျွန်တော်တို့တိုင်းရင်းသားတစ်ယောက်က ၄ မဲဆန္ဒပြုခွင့်ရှိတယ်။ ရခိုင်အမျိုးသားတစ်ယောက်က ရခိုင်ပါတီအတွက် တစ်မဲရတယ်ပေါ့။ ကျွန်တော်တိုင်းရင်းသား တစ်ယောက်ဖြစ်ခွင့်ရတဲ့အတွက် ၄မဲရတယ်။ တိုင်းရင်းသား တစ်ယောက်မဟုတ်ဘူးဆိုရင်တော့ ၃မဲပဲရမှာပေါ့။ တိုင်းရင်းသားတစ်ယောက်ဖြစ်တဲ့အတွက်ဂုဏ်ယူမိပါတယ်။

-အခုရွေးကောက်ပွဲလဲပြီးသွားပြီဆိုတော့ မြန်မာနိုင်ငံကို ဖြစ်စေချင်တဲ့ ဆန္ဒလေး။

နိုင်ငံကြီးတစ်ခုလုံးရဲ့ မျှော်လင့်ချက်နဲ့ပတ်သက်ပြီး အမှန်တကယ် တိုးတက်ပြောင်းလဲမှုကို လိုချင်တဲ့အတွက်ကြောင့်မို့လို့ကျွန်တော်တို့က ဒီရွေးကောက်ပွဲမှာ မိမိတို့ရဲ့ ဆန္ဒတွေကို ထုတ်ဖော်ခွင့်ရခဲ့တယ်။ အဲ့ဒီလိုမျိုး အမှန်တကယ် တိုးတက်ပြောင်းလဲမှုကို ပဲ မျှော်လင့်တယ်။ တကယ်ပြောင်းလဲဖို့ကို လဲ အချိန်အခါကျရောက်နေတဲ့အတွက်ကြောင့်မို့လို့ကျွန်တော်တို့က ဘယ်အရာတွေ တိုးတက်ပြောင်းလဲဖို့လိုအပ်သလဲဆိုတာနဲ့ပတ်သက်ပြီး အဖက်ဖက်မှာ တိုးတက်ပြောင်းလဲဖို့နောက်ကျနေပြီဆိုတော့ အဖက်ဖက်ကပြောင်းလဲရမှာပေါ့နော်။ အဲ့ဒီတော့ ကျွန်တော်တို့ရုပ်ရှင်မှာ အနုပညာရှင်တစ်ယောက်အနေနဲ့ ကိုယ်ဖြတ်သန်းနေတဲ့ အနုပညာခရီးတစ်လျှောက်လုံးမှာဆိုရင် တော်တော်လေး နောက်ကျနေခဲ့ပြီ။ ဒါကျွန်တော်တို့လဲ မြင်နေရသလို ပရိသတ်တွေလဲတွေ့နေရတယ်။ ကျွန်တော်တို့ရဲ့ တင်ဆက်မှု အပိုင်းနောက်ကျနေမှုတွေ၊ အနုပညာပိုင်းနောက်ကျနေမှုတွေဒီဟာတွေကို ပြုပြင်ပြောင်းလဲရမှာပေါ့။ ပြုပြင်ပြောင်းလဲဖို့အတွက်ကိုလဲ အခွင့်အရေးရှိလာပြီ။ အရင်တုန်းကမရခဲ့တဲ့ ပိတ်ဆို့မှုတွေ၊ နောက်ရိုက်ကူးမှုမှာ လွတ်လပ်မှုမရှိခဲ့တဲ့ အကြောင်းအရာတွေ၊ ဒါတွေလဲ လွတ်လွတ်လပ်လပ်ရိုက်ခွင့်ရလာမယ်။ နောက်ပြီးတော့ ရုပ်ရှင်ကို ရှေ့ဆက်ပြီးတော့ မြန်မာ့ရုပ်ရှင်က အဆင့်မှီမှီခေတ်မှီမှီဖြစ်ပေါ်လာစေဖို့အတွက် ရိုက်ကူးတဲ့ထုတ်လုပ်သူတွေကလဲ မိမိကြိုးစားရင်ကြိုးစားသလို ကျွန်တော်တို့ပြသနိုင်ဖို့အတွက်စနစ်တွေကိုလဲ ပြုပြင်ပြောင်းလဲသွားမယ်ဆိုလို့ရှိရင် ကျွန်တော်တဖြည်းဖြည်းနဲ့အရင်ကလိုမျိုးပဲ ရုပ်ရှင်ခေတ်တစ်ခုကို ပြန်ရောက်လာမယ်လို့ထင်ပါတယ်။

-NLD နိုင်သွားတဲ့ စိတ်ခံစားချက်လေးဝေမျှပေးပါဦး။

ဝမ်းသာပါတယ်။ ကျွန်တော်တို့ရဲ့ မျှော်လင့်ချက်တစ်ခုဟာ ကျွန်တော်တို့မျက်လုံးရှေ့မှာ မြင်လိုက်ရတဲ့အချိန်မှာ အရမ်းပီတိဖြစ်မိပါတယ်။

-အခုရိုက်နေတဲ့ကားလေးအကြောင်းကို အရင်ပြောပြပေးပါဦး။

တန်ဖိုးနည်း ချစ်သူစီမံကိန်းတဲ့။ ဒါရိုက်တာကကိုသားညီ၊ မင်းသမီးကရွှေသမီးပေါ့။ ကျောင်းသားဖန်စီအချစ်ကားလေးပါပဲ။ ဒီကားမှာက နယ်ကနေ ရန်ကုန်မှာ ကျောင်းတက်ရင်းအလုပ်လုပ်ကြရတဲ့ကာရိုက်တာတစ်ခုပေါ့။ အဓိက ဒီကားလေးရဲ့ရည်ရွယ်ချက်ကတော့ လူအချင်းချင်းတစ်ယောက်ကိုတစ်ယောက်ကူညီရိုင်းပင်းပေးရင်း မိမိပတ်ဝန်းကျင်၊ မိမိနေထိုင်ရာနေရာလေးက အပျော်ရွှင်ဆုံးနဲ့အဆင်ပြေဆုံး နေနိုင်အောင်ကြိုးစားရမယ်ဆိုတဲ့သဘောပေါ့။ မိမိရဲ့ကံကြမ္မာအပြောင်းအလဲကြောင့် စိတ်ဒုက္ခရောက်ရတာမျိုးလေးတွေလဲပါတယ်။ အချစ်ကို ပုံစံတစ်မျိုးလေးနဲ့ဖော်ကြူးထားတယ်ပေါ့။

-ဒီကားပြီးရင် ထပ်ရိုက်မဲ့ကားက။

ဒီကားပြီးရင် ကလောရယ်၊ အောင်ပန်းရယ်သွားဖို့ရှိတယ်။ ဒါရိုက်တာ ကိုမိုးဦးနဲ့ ကျွန်တော်ရယ်၊ ကိုလူမင်းရယ်ပေါ့။ ရုပ်ရှင်ကားကြီးပေါ့။ သွားရိုက်ရမယ်။ အဓိကက ရောင်စုံသူပုန်ခေတ်ကို အခြေခံပြီးတော့မှ အက်ရှင် ကော်မဒီရန်ဖက်ကို သွားထားပါတယ်။

-ပြည်ပခရီးစဉ်တွေရော လက်ခံထားတာရှိဦးမလား။

ရှိပါတယ်။ သြစတေးလျ၊ စင်ကာပူ၊ ဘန်ကောက်ရှိပါမယ်။ ဒီနှစ်ထဲမှာ ပဲဖြစ်မှာပါ။

-We Love Nay Toe လေးနှစ်ပြည့်နဲ့ပတ်သက်ပြီး အမှတ်တရစကားလေးပြောပေးပါဦး။

အဓိကကတော့ ကျွန်တော့်ရဲ့ပရိသတ်တွေ စုစုစည်းစည်းနဲ့နေကြတယ်။ We Love တင်မဟုတ်ဘူး။ တခြား Our Heart နေတိုးတို့အများကြီး ရှိကြတယ်ပေါ့။ ကျွန်တော့်ပရိသတ်တွေ အွန်လိုင်းမှာ အစုအဖွဲ့တွေနဲ့ တကယ်ပျော်ရွှင်စရာကောင်းပြီးတော့မှ အားပေးခဲ့ကြတဲ့ ပရိသတ်တွေနဲ့ အလှူအတန်းတွေလဲ အတူတူ လုပ်ခွင့်ရခဲ့ကြတယ်။ အနုပညာသမားတစ်ယောက်အတွက်ကတော့ ပရိသတ်တွေစုစုစည်းစည်းအားပေးတာကို ကြည်နူးမိတယ်။ အင်အားဖြစ်စေတယ်။ နောင်အနာဂတ်အတွက်လဲ အင်အားဖြစ်စေတယ်။ ကိုယ့်အနုပညာလုပ်ရတာလဲ လုပ်ရကျိုးနပ်တယ်။ အားလုံးကိုလဲ ကျေးဇူးအမြဲတင်နေပါတယ်လို့ပြောပြခဲ့ပါတယ်။